Ururka Iskaashiga Islaamka oo cambaareeyay kitaabkii Qur`aanka ee lagu gubay Sweden

Tebin toos ah

1. 31 Agoosto 2020Somaliland oo baareysa saameynta ka dhalan karta anteenada shirkadaha isgaarsiinta

   Article Information

   • • Author, Sidiiq Muxumad Burmad
     • Role, BBC News Somali

   Jamhuuriyadda Iskeed ugu Dhawaaqday Madaxbannaanida ee Somaliland ayaa maanta sheegtay inay bilaabayso baadhista halista caafimaad ee ay keeni karaan anteenada ama taawarrada shirkadaha isgaadhsiinta.

   Dowladda ayaa soo iibsatay qalab lagu ogaanayo awoodda hirarka ay taawarradu gudbinayaan.

   Wasiirka isgaadhsiinta Somaliland Cabdiwali Cabdillaahi Suufi ayaa sheegay in qalabkan loogu talogalay inuu maamulo hirarka isgaarsiinta, in lagula socdo shucaaca ka soo baxa taawarrada iyo goobaha isgaarsiinta, iyo in lagu hormariyo cilmi baarista teknolojiyadda.

   Weriyaha BBC-da Sidiiq Muxumad Burmad ayaa sheegay in hore ay u jirtay cabasho iyo cabsi laga qabo saamaynta caafimaad darro ee ka dhalan karta hirarkaas oo dad badani ka hadlaan qaarkoodna ay qoraallo ka sameeyeen.

   Wuxuu wasiirku sheegay in tallaabo sharci ah laga qaadi doono shirkaddii lagu helo in ay taawarradeedu sababaan xaalad caafimaad darro.

2. 31 Agoosto 2020Dowladda Sudan iyo mucaaradka oo kala saxiixday heshiis nabadeed

   

   Xigashada Sawirka, Getty Images

   Dowladda ku meel gaarka ah ee Sudan ayaa heshiis nabadeed la saxiixatay kooxaha mucaaradka ah, heshiiskaas oo ka dhacay xaflad lagu qabtay dalka deriska la ah ee Suudaanta Koofureed.

   Heshiiska ayaa looga gol leeyahay soo afjaridda dagaal 17 sano ka socday gobolka Darfur iyo gobollada koofureed.

   Waa tallaabo muhiim ah oo loo qaaday soo afjaridda dhowr isku dhacyo oo dalkaasi ka dhacay, sida ay ku warrantay wakiil-wareedka sare ee BBC ee Afrika, Anne Soy.

   Balse labo koox oo mucaarad ah ayaa diiday inay saxiixaan heshiiska oo la iskula soo qaaday arrimaha la xiriira lahaanshaha dhulka, awood qeybsiga iyo in guryahooda lagu celiyo malaayiin qof oo dagaalka ku barakacay.

   Heshiisyadii hore ee lagu soo afjarayay dagaalka muddada dheer socday ayaa guul darreystay.

3. 31 Agoosto 2020Ururka Iskaashiga Islaamka oo cambaareeyay kitaabkii Qur`aanka ee lagu gubay Sweden

   

   Xigashada Sawirka, EPA

   Ururka Iskaashiga Islaamka ee (OIC) ayaa cambaareeyay nuqul ka mid ah kitaabkii Qur`aanka ee lagu gubay magaalada koofurta Sweden ku taalla ee Malmo, sida ay ku warrantay wakaaladda wararka Anadolu.

   Warbixin uu soo saaray ururka oo fadhigiisu yahay magaalada Jiddah ayaa lagu sheegay in falka gubitaanka kitaabka uu yahay “fal kicin ah” uuna “ka hor imaanayo dadaallada caalamiga ah ee lagula dagaallamayo cunsurinimada iyo kicinta nacaybka ku saleysan diinta”.

   Taageerayaasha hoggaamiyaha cunsuriga ah ee Denmark u dhashay Rasmus Paludan ayaa Jimcihii Malmo ku gubay nuqul kitaab Qur`aan ah.

   Isu soo bax ay sameeyeen ayaa waxaa hareeyay rabshado, lagu dhaawacay dhowr sarkaal oo booliiska ka tirsan. Ugu yaraan 10 qof ayaa lagu xiray isu soo baxyadaas. Booliiska ayaa sidoo kale muddo labo sano ah ka mamnuucay Paludan inuu Sweden tago.

   Ururka OIC ayaa soo dhoweeyay tallaabada uu qaaday booliiska Sweden.

   Dhanka kale, Pakistan ayaa si xooggan u cambaareysay falkaasi lagu gubay nuqul ka mid ah kitaabka Qur`aanka.

   Afhayeen u hadlay Pakistan ayaa sheegay in dhacdooyinka ku saleysan nacaybka Islaamka ee meelo badan ka dhacaya ay ka hor imaanayaan shurcuuda diin walba.

4. 31 Agoosto 2020Shiinaha iyo Hindiya oo markale ku dagaallamay xuduudda

   

   Xigashada Sawirka, Getty Images

   Hindiya ayaa ku eedeysay Shiinaha inay ku xadgudubtay heshiiska xudduudda ee ay labada dal ku gaareen wada hadalladii nabadda ee ay dhowaan yeesheen.

   Waxay sheegtay in ciidamada Shiinaha ay sameeyeen "dhoollatus milatari" si loo beddelo maqaamka Ladakh.

   Ugu yaraan 20 askari oo Hindi ah ayaa ku dhintay isku dhac gobolkaa ku dhex maray ciidamada Hindiya iyo Shiinaha. Shiinaha ma aysan sheegin in askar ay kaga dhimatay dagaalka.

   Labada dal ee haysta hubka nukliyeerka ayaa midba kan kale ku eedeeyay inuu heshiiska xadka ku xadbugbay uuna daandaansi dagaal wado.

   Shiinaha weli kama uusan jawaabin eedeymihii ugu dambeeyay ee Shiinaha, oo imaanaya kaddib dhowr mar oo ay wada hadal nabadeed yeesheen labada dal tan iyo bishii June.

   Maxaa dhacay June?

   Wararka warbaahinta ayaa sheegaya in ciidamadu uu isku dhac ku dhex maray buuro dhererkoodu yahay 4,300m (14,000ft), iyadoo qaar ka mid ah ciidamada Hindiya ay ku dhaceen webiga Galwan ee xowliga u socda, iyadoo heerkulka cimiladuna uu eber ka hooseeyay.

   Ugu yaraan 76 ciidamada Hindiya ka tirsan ayaa la sheegay inay dhaawacmeen halka 20 kalena ay dhinteen. Shiinaha ma uusan shaacin khasaaraha gaaray ciidamadiisa.

   Dagaalka ayaa dhacay iyadoo aysan labada ciidan heysan wax hub ah sababtoo ah heshiiskii 1996 ayaa mamnuucaya in hub iyo waxlaha qarxa lagu haysto aaggaas.

   Maxay ciidamadu isugu dhaceen?

   Xadka labada dal u dhaxeeyo ma aha mid si sax ah loo calaameyn karo. Waxaa halkaas mara webiyo iyo harooyin kuwaas oo hadba dhinac aadi kara.

   Ciidamada ku sugan labada dhinac ee kala matalaya labada dal ee haysta ciidamada ugu badan adduunka ayaa dhowr jeer weji ka weji isaga hor yimid.

   Hindiya ayaa Shiinaha ku eedeysay in kumannaan ciidamo ah uu u soo diray harada Galwan waxayna intaas ku dartay in Shiinaha haysto dhul dhan 38,000sq km (14,700sq miles) oo geyigeeda ka tirsan.

   Dhowr wada hadal oo ay yeesheen soddonkii sano ee la soo dhaafay ayaa lagu guul darreystay in lagu xalliyo muranka.

   Labada dal ayaa keliya hal mar is dagaalay, sanadkii 1962, markaas oo Hindiya ay la kulantay guul darro weyn.

   Dadka falanqeeya arrimahan ayaa sheegaya in laga yaabo in dhismaha waddooyinka ee ay Hindiya waddo uu ka careysiiyay Beijing.

5. 31 Agoosto 2020Qatar Airways oo dib u bilaabeysa duullimaadyadii ay ku tegi jirtay Muqdisho

   

   Xigashada Sawirka, Getty Images

   Shirkadda diyaaradaha Qatar Airways ayaa ku dhawaaqday in 6-da September ay dib u bilaabi doonto duullimaadyadii ay saddex jeer toddobaadkii ku tegi jirtay Muqdisho.

   Shrikadda ayaa haatan soo celisay duullimaadyadii ay ku tegi jirtay dhowr meelood oo Afrika ka tirsan sida magaalooyinka Addis Ababa, Dar es Salaam, Djibouti, Kigali, Kilimanjaro, Nairobi, Tunis iyo Zanzibar.

   Tan iyo intii uu bilowday xanuunka safmarka ah ee Coronavirus, shirkadda Qatar Airways ayaa si joogto duulimaadyo uga sameyn jirtay qeybo ka tirsan Afrika.

   Shirkadda ayaa bishii la soo dhaafay dib u bilowday duullimaadyadii ay ku tegi jirtay Jabuuti.

6. 31 Agoosto 2020Haweeney ayadoo qaawan muuqaal isaga duubtay buundo “muqadas ah” oo la xiray

   

   Xigashada Sawirka, Getty Images

   Haweeney u dhalatay dalka Faransiiska ayaa lagu xiray Hindiya kaddib markii ayadoo qaawan ay muuqaal isaga duubtay buundo “Muqadas” ah oo ku taalla magaalada Rishikesh ee waqooyiga Hindiya.

   Muuqaalka lagu duubay buundada Lakshman Jhula, ayaa la soo dhigay baraha bulshada.

   Haweeneydan ayaa lagu qaadi doonaa sharciga internet-ka ee Hindiya, haddii eedda lagu helana waxay wajihi doontaa saddex sano oo xabsi ah.

   Buundada oo marta webiga Ganges ayaa ah meel “barakeysan” waxay caan ku tahay dalxiisayaasha.

   Haweeneydan, oo damaanad lagu sii daayay ayaa booliiska u sheegtay in muuqaalkaas loogu talogalay in lagu xayeysiiyo ganacsigeeda dahabka.

   Booliiska ayaa sheegay in waxyaabahan laga yaabo inaysan Faransiiska dembi ka ahayn, balse buundadaasi ay tahay mid barakeysan.

   Haweeneydan, oo aan magaceeda la shaacin, ayaa Khamiistii la xiray kaddib amrkii booliiska lagu wargeliyay muuqaalka.

7. 31 Agoosto 2020Masar: Raggii baxsaday ee ku eedeysnaa kufsi ka dhacay hoteel caan ah oo la soo qabtay

   

   Xigashada Sawirka, AFP

   Ciidamada ammaanka Lubnaan ayaa xiray shan eedeysane oo lala xiriirinayo inay haweeney kufsi ugu geysteen hoteel caan ah oo ku yaalla caasimadda Masar, Qaahira.

   Dacwad oogaha Masar ayaa toddobaadkii hore sheegay in toddoba ka tirsan sagaal kufsigaas lagu eedeeyay ay dalkaasi ka qaxeen kahor intaan dacwadda laga gudbin horraantii bishan.

   Saddex ka tirsan eedeysanayaashaas ayaa Lubnaan lagu xiray toddobaadkii hore dhammaadkiisii, sida ay sheegeen ciidamada ammaanka Lubnaan.

   Labo kale ayaa isaga tagtay Lubnaan.

   Dacwad oogaha Masar ayaa amray in la soo xiro labo eedeysane oo weli ku sugan Masar.

   Wuxuu xusay in hay`adaha caalamka ay kala shaqeynayaan sidii loo soo xiri lahaa eedeysanayaasha baxsaday.

   Sagaalkan nin ayaa la sheegay inay haweeney kufsi ugu geysteen Hoteelka Fairmont sanadkii 2014.

   Kiiskan ayaa lagu shaaciyay baraha bulshada bishii July.

8. 31 Agoosto 2020Madaxweynaha Koofur Afrika oo lagu eedeeyay musuqmaasuq

   

   Xigashada Sawirka, Reuters

   Saraakiisha xisbiga talada haya ee Koofur Afrika ayaa sheegay in Madaxweyne Cyril Ramaphosa uu hor imaan doono guddiiga anshaxa si uu uga jawaabo su`aalo ku saabsan lacag la sheegay in la geliyay ololaha hoggaanka xisbigaas.

   Balse Jessie Duarte, oo ka tirsan xisbiga ANC ma uusan sheegin xilliga rasmiga ah ee Mr Ramaphosa uu hor imaan doono guddiga.

   Warbixin ay soo saartay waaxda ka hortagga musuqmaasuq ee Koofur Afrika ayaa waxaa lagu sheegay in Mr Ramaphosa uu marin habaabiyay baarlamaanka beenna uu ka sheegay lacag uu helay sanadkii 2017, taas oo dhan $35,955(£26,900).

   Mr Ramaphosa ayaa ku adkeysanaya in lacagtaasi ay ahayd deeq loogu talo galay ololihiisii hoggaaminta xisbiga ANC.

   Madaxweyne ahaan, Mr Ramaphosa ayaa qalqal geliyay sumcaddiisa ku aaddan hagaajinta siyaasadda Koofur Afrika tan iyo intii uu beddelay Jacob Zuma.