வவுனியா பிரஜைகள் குழு தலைவர் மீது தாக்குதல்
வவுனியா பிரஜைகள் குழு தலைவர் கிருஸ்ணபிள்ளை தேவராசா அவர்கள் நேற்றிரவு நெடுங்கேணியில் அடையாளம் தெரியாதவர்களினால் தாக்கப்பட்டிருப்பதாகக் காவல்துறையினர் தெரிவித்திருக்கின்றார்கள்.
பயங்கரவாதத் தடைச் சட்டத்தின் கீழ் தடுத்து வைக்கப்பட்டுள்ள பாலேந்திரன் ஜெயக்குமாரி உள்ளிட்ட விசாரணைகளின்றி தடுத்து வைக்கப்பட்டிருப்பவர்களை விடுதலை செய்ய வேண்டும் எனக் கோரி கவனயீர்ப்பு போராட்டம் ஒன்றை வவுனியா பிரஜைகள் குழுவினர் நாளை நடத்தவிருக்கின்ற பின்னணியிலேயே இந்தத் தாக்குதல் நடத்தப்பட்டிருப்பதாகத் தெரிவிக்கப்பட்டிருக்கின்றது.
இரண்டு மோட்டார் சைக்கிள்களில் வந்த நான்கு அடையாளம் தெரியாத ஆட்கள் தனிமையான ஓரிடத்தில் வைத்து ''போராட்டமா நடத்துகிறாய் போராட்டம், அதற்குள் உன்னைக் கொல்வோம்'' என திரும்பத் திரும்ப கூறியபடி, தன்னை இரும்புக் கம்பிகளினால் சரமாரியாகத் தாக்கியதாக வவுனியா பிரஜைகள் குழு தலைவர் தேவராசா பிபிசி தமிழோசையிடம் தெரிவித்தார்.
நெடுங்கேணி வைத்தியசாலையில் அனுமதிக்கப்பட்டிருந்த அவர் தற்போது வவுனியா வைத்தியசாலையில் சிகிச்சை பெற்று வருகின்றார். இந்தத் தாக்குதலானது ஒரு கொலை முயற்சியென்றும், சாத்வீகப் போராட்டங்களை முன்னெடுக்கின்ற தமது நடவடிக்கைகளைத் தடுத்து நிறுத்துவதற்காகவே மேற்கொள்ளப்பட்டிருக்கின்றது என்றும் வவுனியா பிரஜைகள் குழுவின் செயலாளர் தியகாராஜா நவராஜ் அவர்கள் கூறுகின்றார்.
எனினும் திட்டமிட்டபடி தமது கவனயீர்ப்புப் போராட்டம் நடத்தப்படும் என்றும் அவர் தெரிவித்தார்.
இந்தத் தாக்குதல் சம்பவம் குறித்து பிபிசியிடம் தகவல் வெளியிட்ட காவல்துறை பேச்சாளர் அஜித் ரோகண அவர்கள், தாக்குதல் நடத்தப்பட்டதற்கான காரணம் என்னவென்று தெரியவில்லை எனக் கூறினார்.
அத்துடன் தாக்குதல் நடத்தியது யார் என்பதைக் கண்டறிவதற்கான விசாரணைகள் நடைபெறுகின்றன என்றும் காவல்துறை பேச்சாளர் அஜித் ரோகண தெரிவித்தார்.
