قے آئے تو فوراً ٹویٹ کریں

اگر آپ کو مسلسل قے یا اسہال کی شکایت ہو تو فوراً اپنا موبائل فون اٹھائیں اور ٹوئٹر پر اس کی اطلاع دیں۔

اس سے آپ کی مشکل میں کوئی کمی تو نہیں آئے گی لیکن ایک یا دو ٹویٹس سے محققین کو سرد موسم میں قے آنے سے متعلق جراثیم کو سمجھنے میں مدد مل سکتی ہے۔

برطانیہ کی فوڈ سٹینڈرڈ ایجنسی نورو وائرس سے پیدا ہونے والی بیماری یعنی موسم سرما میں قے آنے کو سمجھنے کے لیے سوشل میڈیا کا استعمال کر رہی ہے۔

نورو وائرس کھانے پینے کی چیزوں کے ذریعے یا پھر ذاتی رابطے سے پھیلتا ہے۔ اس کی علامات ایک سے دو دن میں ظاہر ہوتی ہیں اور انفیکشن کا اثر اگلے دو دنوں تک موجود رہتا ہے۔

2013 میں فوڈ سٹینڈرڈ ایجنسی نے اس وائرس کے بارے میں معلومات جمع کرنے کا آغاز کیا تھا۔

ایجنسی نے پہلے تو گوگل سرچ کے اعداد و شمار کی مدد لی جس سے انھیں معلوم ہوا کہ اس حوالے سے معلومات حاصل کرنے کا بہترین ذریعہ سوشل میڈیا ہو سکتا ہے۔

اس حوالے سے ڈاکٹر سیان ٹامس کا کہنا ہے کہ ’یہ سب فوری طور پر معلومات حاصل کرنے سے متعلق ہے کہ ان کی زندگیوں میں اس وقت کیا ہو رہا ہے۔‘

ڈاکٹر سیان کے مطابق: ’اگر آپ کسی ہسپتال میں یا کسی نرسنگ ہوم میں ہیں تو عملہ آپ نمونے حاصل کرنے کے بعد اسے لیبارٹری میں بھیج دیتا ہے۔‘

فوڈ سٹینڈرڈ ایجنسی ان سرکاری نمونوں کا اس سے وائرس سے متعلق ٹویٹس کے ساتھ موازنہ کرتی ہے۔ پھر اس سے نتائج حاصل کیے جاتے ہیں کہ ’بیمار ہونے سے متعلق ٹویٹس اور لیبارٹری نمونوں کے درمیان کیا تعلق موجود ہے۔‘

انھوں نے کہا کہ ہمارا اندازہ ہے کہ ہم 70 سے 80 فیصد تک درست پیشن گوئی کر سکتے ہیں کہ اگلے ہفتے اس مرض کے پھیلاؤ میں اضافہ ہو سکتا ہے۔‘