روس میں خود کش حملہ پانچ ہلاک
روسی ریاست داغستان میں پولیس ہیڈکواٹر پر خود کش حملے میں چھ پولیس اہلکار ہلاک اور پندرہ زخمی ہوگئے ہیں۔
اطلاعات کے مطابق جنوبی روس کے علاقے داغستان کے دارالحکومت مکہاچکلہ میں پولیس ہیڈکواٹر پر ہونے والے خود کش بم حملے میں کم از کم چھ پولیس اہلکار ہلاک ہوگئےہیں۔
مقامی حکومت کے ترجمان نے کہا ہے کہ خود کش دھماکہ اس وقت ہوا جب بدھ کی صبح پولیس اہلکارہیڈکواٹر میں لائن لگا کردن کی ڈیوٹی کے احکامات حاصل کر رہے تھے۔مقامی حکومت کے اہلکار کے مطابق ایسا لگتا ہے کہ حملہ آور پولیس ہیڈکواٹر کےگیٹ کھلنے کا انتظار کر رہا تھا۔
اہلکار کے مطابق جب پولیس ہیڈکواٹر کے دروازے کھلے تو خود کش حملہ آور نے بارود سے بھری گاڑی کو پولیس ہیڈکواٹر میں داخل کرنے میں کامیاب ہو گیا۔ ترجمان کے مطابق گاڑی میں کم از کم ستر کلو دھماکہ خیز مواد نصب کیا تھا۔
ترجمان کے مطابق حملہ آور کو پولیس افسران تک نہیں پہنچنے دیا گیا اور ایک پولیس گاڑی کو حملہ آور کی گاڑی سے روکا گیا جس کی وجہ کئی قیمتی جانیں ضائع ہونے سے بچ گئیں۔
داغستان کی آبادی کی اکثریت مسلمانوں کی ہے۔ روس میں حالیہ دنوں میں دہشتگردی کی وارداتوں میں اضافہ ہوا اور اس سے پہلے کئی خود کش حملے ہو چکے ہیں۔
