’قذافی کو ہٹانے کے لیےطاقت کا استعمال غلطی ہوگی‘

امریکہ کے صدر براک اوباما نے اپنی صدارت میں شروع کی والی جنگ کا دفاع کیا ہے اور اس بات پر اصرار کیا ہے کہ لیبیا کے خلاف جنگ میں امریکہ کی شمولیت محدود ہو گی۔

امریکی عوام سے اپنے خطاب میں انہوں نے کہا کہ امریکی مداخلت سے ’لامحدود جانیں‘ بچی ہیں جنہیں جابر حکمراں معمر قذافی کی فوجوں سے خطرہ تھا۔

صدر اوباما نے کہا کہ اس میں کوئی شک نہیں ہے کہ لیبیا قذافی کے اقتدار سے باہر ہونے کے بعد بہتر ہو گا لیکن مشن کو پھیلا کے اس میں حکومت کی تبدیلی کو شامل کرنا ایک غلطی ہو گی۔‘

صدر اوباما نے کہا کہ معمر قذافی کی حکومت کو اسلحے کی فراہمی اور رقم تک رسائی کو روکنے کے علاوہ ان کے مخالفین کی مدد کی جائے گی لیکن کرنل قدافی کو ہٹانے کے لیے طاقت کا استعمال غلطی ہو گی۔’ ہم نے عراق میں یہی راہ اپنائی، جس میں ہزاروں امریکی اور عراقی جانوں کا نقصان ہوا اور امریکہ کو ایک کھرب ڈالر کا۔ ہم عراق کی غلطی کو لیبیا میں دھرانے کے متحمل نہیں ہو سکتے۔‘

صدر اوباما نے کرنل قذافی کے حمایتیوں سے کہا کہ وہ ان ساتھ چھوڑ دیں کیونکہ تاریخ معمر قدافی کے ساتھ نہیں ہے۔

تاہم انہوں نے کہا کہ مہم کو شروع کرنے کے بعد بدھ سے امریکہ اسے نیٹو کے حوالے کر دے گا۔ امریکی صدر نے کہا کہ لیبیا اس وقت تک خطرناک رہے گا جب تک کرنل قذافی اقتدار میں ہیں۔دوسری طرف کرنل قذافی کے آبائی شہر سرت کی طرف باغیوں کی پیشقدمی سست پڑ گئی ہے۔

اگرچہ نیٹو اس بات پر اصرار کرتا ہے کہ وہ لڑائی میں غیر جانبدار ہے، تاہم روس نے اس کے متعلق یہ کہہ کر تشویش ظاہر کی ہے کہ اقوامِ متحدہ کی قرارداد 1973 نے اندرونی خانہ جنگی میں مداخلت کی اجازت نہیں دی ہے۔

اقوامِ متحدہ، نیٹو، افریقی یونین اور عرب لیگ کے تقریباً چالیس کے قریب مندوبین منگل کو لندن میں ملاقات کر رہے ہیں جس میں وہ لیبیا کے متعلق مستقبل کے لائحہ عمل پر بات کریں گے۔

لیبیا کے رہنماء کرنل قذافی لندن کانفرنس کے مندوبین کے نام ایک خط میں مطالبہ کیا کہ وہ لیبیا پر وحشیانہ بمباری کو روکوایں۔

واشنگٹن ڈی سی میں نیشنل ڈیفنس یونیورسٹی سے خطاب کرتے ہوئے صدر اوباما نے کہا کہ ’آج رات، میں یہ کہہ سکتا ہوں کہ ہم نے قذافی کی جان لیوا پیشقدمی کو روک دیا ہے۔‘

’ہمیں ہولناک سطح کے ممکنہ تشدد کا سامنا تھا۔ ہمارے پاس اس تشدد کو روکنے کی خاص صلاحیت تھی، جو کہ کارروائی کے لیے ایک بین الاقوامی مینڈیٹ تھا۔ وسیع تر اتحادی ہمارے ساتھ شمولیت کے لیے تیار تھے، عرب ممالک کی حمایت تھی اور لیبیائی عوام کی مدد کے لیے پکار۔‘

لیبیا سے آنے والی اطلاعات کے مطابق باغیوں کی فوج تیزی سے مغرب کو بڑھ رہی ہے لیکن سرت شہر سے جہاں کرنل قذافی کی جائے پیدائش ہے، باغیوں پر حملے ہو رہے ہیں۔

نیٹو نے اسی دوران کہا ہے کہ اس کے فضائی حملے باغیوں کی پیشقدمی کو تحفظ دینے کے لیے نہیں ہیں۔