اناج کی ریکارڈ پیداوار،تحفے میں کیڈیلیک

ترکمانستان کے میڈیا کے مطابق ملک کے صدر نے اس علاقے کی حکومت کو کیڈیلیک گاڑی تحفے میں دی ہے جہاں اناج کی پیداوار سب سے زیادہ ہوئی ہے۔

ترکمانستان کے اخبار نیوٹرل ترکمانستان کے مطابق امریکی لگژری گاڑی کیڈیلیک ایسکلیڈ کا تحفہ لباپ صوبے کی حکومت کو دیا گیا ہے۔

صدر نے یہ انعام صوبہ لباپ کو ساڑھے تین لاکھ ٹن سے زیادہ اناج کی پیداوار کرنے پر دیا۔ یہ گاڑی سرکاری کاموں کے لیے استعمال کی جائے گی۔

نامہ نگاروں کے مطابق کیڈیلیک جیسی گاڑیاں ترکمانستان میں فروخت نہیں ہوتیں اور نہ ہی سرکاری افسران امریکی گاڑیاں استعمال کرتے ہیں۔

ترکمانستان کے صدر سنہ دو ہزار سات سے ملک کے صدر ہیں اور ان کو ملک پر پورا کنٹرول حاصل ہے۔

وہ اپنے مہنگے تحائف کے حوالے سے بہت مشہور ہیں۔ سنہ دو ہزار دس میں بھی انہوں نے حکم دیا تھا کہ ریجنل اور ضلعی گورنروں کو مرسڈیز گاڑیاں دی جائیں۔

بی بی سی کے نامہ نگار کے مطابق صدر کو بھی غیر ملکی کاروباری شخصیات سے تحائف ملتے ہیں لیکن انہیں صوبائی حکام بھی قالینوں، گھوڑوں اور یہاں تک کہ اونٹ کے تحفے دیتے ہیں۔

ترکمانستان کے صدر یہ تمام تحائف مقامی میوزیم میں جمع کروا دیتے ہیں۔

لیکن جہاں صدر نادر تحائف حکام کو بخشتے ہیں وہاں کارکردگی ناقص ہونے پر حکام کی سرزنش بھی کی جاتی ہے۔