Розенберг: АҚШнинг дипломатик ҳаракатлари Украинада тез орада тинчлик ўрнатилишига умид бермаяпти
Сурат манбаси, Getty Images
- Author, Стив Розенберг
- Role, Россия бўйича муҳаррир
- Reporting from, Москва
- Published
- Ўқилиш вақти: 3 дақ
Норвегия пойтахти ва Россиянинг Санкт-Петербург шаҳрида икки кунлик дипломатик музокаралар ўтди. Хўш, бу учрашувлардан сўнг Украинадаги урушни тугатишга умид борми?
Норвегия бош вазири сешанба куни Украина президенти Володимир Зеленский, АҚШ президенти Трампнинг махсус вакили Стив Уиткофф ва Европа вакиллари ўртасидаги музокараларни "яхши ва конструктив" деб баҳолади.
Ослода уч давлат раҳбарининг учрашувини ўтказиш таклифи ўртага ташланди. Уиткоффнинг Россияга сафари Владимир Путин, Зеленский ва Трампнинг учрашиб, жангларни тўхтатиш бўйича келишувга эришишига йўл очади, деган умид билдирилди.
Аммо Путин учрашув Москвада ўтмаса, Зеленский билан музокара столига ўтиришга унчалик хоҳиш билдирмаган.
Кремлга кўра, Россия келаси ой Абу-Дабида уч томонлама музокараларни қайта бошлашга розилик бериши мумкин. Бироқ фақат мутахассислар даражасида.
Уиткоффнинг ўзи ҳам X тармоғидаги постида "ҳали қилиниши керак бўлган муҳим ишлар бор"лигини тан олди. Айни пайтда у "президент Трамп бу урушни тугатиш ниятидан қайтгани йўқ..." деб таъкидлади.
Менимча, бугунги вазиятни энг яққол кўрсатган баёнот Владимир Путиннинг ташқи сиёсат бўйича ёрдамчиси Юрий Ушаковдан чиқди. У Санкт-Петербургдаги музокараларда қатнашганди.
Ушаковнинг айтишича, Стив Уиткофф президент Путинга Ослодаги муҳокамалар ва европаликлар ҳамда Киев таклиф қилган ёндашувлар ҳақида сўзлаб берган. Бу ёндашувларни Уиткофф "янги" деб ҳисоблаган.
Эшитганлари Кремл маслаҳатчисида яхши таассурот қолдирмагани аён эди.
"Украина инқирозини ҳал қилиш нуқтаи назаридан, бу таклифларда фойдали жиҳатлар кўп эмасди", деди Ушаков.
Кейинроқ Россия давлат телевидениеси ундан тинчликка эришиш истиқболлари ҳақида сўради.
"Тинчликка қанчалик яқинлашаётганимизни билмайман, лекин ишлар шу йўналишда кетяпти", деди Юрий Ушаков.
Буларнинг бари анча мавҳум гаплар.
Афтидан, президент Путин ҳозир урушни тугатишга ундайдиган босимни ҳис қилмаяпти.
У Украинанинг ҳаво ҳужумидан мудофаа тизими қаттиқ зўриқаётганини билади.
Қиш яқинлашаётганини ҳам билади. Совуқ ҳавони эса Украинага кучли зарбалар бериб, уни таслим бўлишга мажбурлаш учун қулай имконият деб кўраётган бўлиши мумкин.
Шунингдек, у Оқ уйда Москва билан алоқаларни кенгайтириш, яхшилаш ва улардан кўпроқ манфаат кўришни очиқ-ойдин истаётган АҚШ президенти борлигини ҳам билади.
End of Ижтимоий тармоқлардаги саҳифаларимиз
Сурат манбаси, Getty Images
Сўнгги кунларда Доналд Трамп Москвага нисбатан айрим санкцияларни вақтинча бекор қилди, Россиядан дизел ёқилғиси сотиб олишга рози бўлди ва президент Зеленскийни кескин танқид қилди.
Бу Россияга жуда қўл келади. Кремл раҳбарига босимни камайтиради.
"Ҳозир Ғарбда тинчлик учун бирор иш қилаётган ягона раҳбар - Трамп", дейди россиялик депутат ва телебошловчи Евгений Попов.
"Тинчлик учун иш қиляпти, аммо сизларнинг шартларингиз асосидаги тинчлик учунми? Сизлар шуни истайсизларми?" деб сўрайман.
"Албатта!"
Hozir G‘arbda tinchlik uchun biror ish qilayotgan yagona rahbar - Tramp
Путин, Зеленский ва Трампнинг уч томонлама учрашуви яқин орада бўлмаслиги мумкин.
Аммо келаси ой Хитойда АПЕК - Осиё-Тинч океани иқтисодий ҳамкорлик форуми саммити доирасида Владимир Путин, Доналд Трамп ва Си Жинпин алоҳида учрашиши мумкин.
Бу ердаги айрим шарҳловчилар уни аллақачон "Янги Ялта" деб аташмоқда. Бу - 1945 йилги Ялта конференциясига ишора. Ўшанда Сталин, Черчилл ва Рузвелт урушдан кейинги Европанинг сиёсий тузилиши ва ҳудудий тақсимотини қайта белгилашни режалаштириш учун учрашганди.
"Ҳозир дунёда фақат Россия, Хитой ва АҚШ супердавлат ҳисобланади", дейди Евгений Попов. "Албатта, раҳбарларимиз Хитойда учрашса, бу бутун дунё учун яхши бўлади".
Қарийб беш йиллик урушдан сўнг бундай учрашув Владимир Путинни айнан ўзи истаган жойга - жаҳон сиёсатини белгилайдиган энг нуфузли раҳбарлар даврасига олиб чиқарди.
