Dyn, 66, yn pledio'n euog i lofruddio mam i bedwar ar ôl ffrae

Charlene DowsellLlun teulu

Bu farw Charlene Dowsell wedi'r digwyddiad yng Nghasnewydd ym mis Gorffennaf

Harri Evans
BBC Cymru Fyw

Mae dyn 66 oed wedi pledio'n euog i lofruddio dynes yng Nghasnewydd yn dilyn ffrae.

Cafodd y gwasanaethau brys, gan gynnwys swyddogion heddlu arfog, eu hanfon i Heol St Vincent mewn ymateb i adroddiadau o ffrae y tu allan i eiddo yn ystod yr oriau mân ddydd Sadwrn,18 Gorffennaf.

Bu farw Charlene Dowsell, a oedd yn fam i bedwar o blant, ychydig bellter i ffwrdd ger Heol Cas-gwent, er gwaethaf ymdrechion parafeddygon i'w hachub.

Mae Albert Williams, o Heol Ruperra, wedi pledio'n euog i lofruddio yn Llys y Goron Caerdydd a bydd yn cael ei ddedfrydu ar 21 Rhagfyr.

Heol St Vincent, Casnewydd

Cafodd y gwasanaethau brys eu galw wedi adroddiadau o ffrae tu allan i eiddo yn Heol St Vincent ddydd Sadwrn, 18 Gorffennaf

Roedd teulu Ms Dowsell, a oedd yn y llys, mewn dagrau yn yr oriel gyhoeddus wrth i'r ple gael ei gyflwyno.

Mewn datganiad cynharach, dywedon nhw eu bod wedi cael eu "calonnau wedi torri", a bod ei phedwar plentyn wedi cael eu gadael "heb fam".

Dilynwch Cymru Fyw ar Facebook, X, Instagram neu TikTok.

Anfonwch unrhyw syniadau am straeon i cymrufyw@bbc.co.uk neu cysylltwch drwy WhatsApp ar 07709850033.

Lawrlwythwch yr ap am y diweddaraf o Gymru ar eich dyfais symudol.

Pynciau cysylltiedig

Straeon perthnasol